У Беларусі будуць паступова знімаць забароны на наведванне лясоў

У Беларусі будуць паступова знімаць забароны на наведванне лясоў, паведамілі карэспандэнту БЕЛТА ў прэс-службе Міністэрства лясной гаспадаркі.

"У Беларусі 1 мая было зафіксавана 11 лясных пажараў на плошчы 4,7 га. У апошнія два дні (2-3 мая) узгаранняў у лясным фондзе наогул не было. Пасля выпадзення ападкаў сітуацыя з ляснымі пажарамі пачала стабілізавацца. Рэгіёны будуць паступова знімаць забароны на наведванне лясоў", - расказалі ў прэс-службе.

У гэтым годзе адбылося ўжо 665 лясных пажараў. Агульная плошча ачагоў перавысіла 5,9 тыс. га. Найбольшая колькасць пажараў (256) адбылася ў лясгасах Брэсцкай вобласці. Асноўнай прычынай узгаранняў называецца чалавечы фактар.

Забароны на наведванне лясоў на сёння дзейнічаюць у 59 раёнах Беларусі, у тым ліку на ўсёй тэрыторыі Гомельскай вобласці. У Гродзенскай вобласці абмежаванні ўжо знялі ў Шчучынскім, Навагрудскім і Ваўкавыскім раёнах, у Брэсцкай - у Ляхавіцкім і Ганцавіцкім. У Мінскай вобласці забароны яшчэ дзейнічаюць у сямі раёнах (Вілейскім, Маладзечанскім, Валожынскім, Барысаўскім, Пухавіцкім, Салігорскім і Любанскім), на Магілёўшчыне - у двух (Касцюковіцкім і Хоцімскім). У Віцебскай вобласці абмежаванні на наведванне лясоў уведзены толькі ў Верхнядзвінскім раёне.

Рашэнні па ўвядзенні і зняцці забароны на наведванне лясоў прымаюць мясцовыя органы ўлады па хадайніцтве лесагаспадарчых устаноў або раённых аддзелаў па надзвычайных сітуацыях. Меры абмежавальнага характару ўводзяцца ў выпадку ўстанаўлення высокага класа пажарнай небяспекі. Галоўная мэта ўвядзення забарон на наведванне лясоў - гарантаванне бяспекі грамадзян, захаванасці іх маёмасці, а таксама ляснога фонду.

Парушэнне патрабаванняў пажарнай бяспекі ў лясах і на тарфяніках або забароны на іх наведванне без прычынення ўрону прыводзіць, згодна з арт.15.29 КоАП, да папярэджання або штрафу ў памеры да 25 базавых велічынь (1 БВ - Br27).

На сайце Міністэрства лясной гаспадаркі размешчана інтэрактыўная карта забарон і абмежаванняў на наведванне лясоў. З яе дапамогай можна ў аператыўным рэжыме адсачыць, у якіх рэгіёнах часова забаронена наведваць лясны фонд.-0-

НАВIНЫ БЕЛАРУСI