У Беларусі мэтанакіравана шукаюць і падтрымліваюць таленты, беражліва захоўваюць культурную спадчыну - Дулава

У Беларусі мэтанакіравана шукаюць і падтрымліваюць таленты, беражліва захоўваюць культурную спадчыну ва ўсёй яе разнастайнасці. Такое меркаванне карэспандэнту БЕЛТА выказала рэктар Беларускай дзяржаўнай акадэміі музыкі доктар мастацтвазнаўства, прафесар Кацярына Дулава. Субяседніца падкрэсліла, што зыходнай кропкай у справе падтрымкі талентаў з'яўляецца стварэнне спецыяльных фондаў Прэзідэнта. "Больш за два дзесяцігоддзі прадаўжаецца важнейшая работа па выяўленні, падтрыманні талентаў. Сёння мы гаворым пра цэлае пакаленне маладых людзей, якія дзякуючы гэтай падтрымцы засталіся ў краіне ствараць, навучаць. У суверэннай Беларусі вырасла пакаленне заслужаных і народных артыстаў. Важна, што яны сёння выступаюць і ў якасці педагогаў, творчых кіраўнікоў. Для мастацкай адукацыі вельмі важна творчая школа. Гэта найважнейшая, фундаментальная тэндэнцыя з пункту гледжання стаўлення да таленавітых людзей", - адзначыла Кацярына Дулава. Яшчэ адным значным дасягненнем яна лічыць створаную ў краіне сістэму мастацкай адукацыі. "У Еўропе, у суседніх краінах яна была кардынальна рэфармавана. У Беларусі яе захавалі, прыслухаліся да меркавання творчых людзей. Яна выбудавана прадумана і карэктна, своечасова і разумна абнаўляецца. Ступені адукацыі - дзіцячыя музычныя школы і школы мастацтваў, каледжы і, нарэшце, ВНУ - забяспечваюць пераемнасць і раннюю прафесіяналізацыю. "Гэта гістарычная сістэма, якая сябе зарэкамендавала і апраўдала. Творчаму чалавеку нельга вучыцца хутка і выпадкова. Чым даўжэй ён знаходзіцца ў адукацыйнай сістэме, у мастацтве, тым лепш. Каб стаць сапраўдным мастаком, патрэбны час. У Беларусі гэта разумеюць", - сказала прафесар. Кацярына Дулава звярнула ўвагу, што гэтак жа беражліва ў Беларусі ставяцца да культурнай спадчыны ў цэлым. "Нам сёння ёсць чым ганарыцца: унікальныя помнікі архітэктуры, сярод якіх замкі ў Міры і Нясвіжы, Свята-Барыса-Глебская царква ў Гродне, храм Пакрова Прасвятой Багародзіцы, Усіхсвяцкі сабор у Мінску, а таксама музычнага, тэатральнага, выдавецкага мастацтва, літаратуры. Мяне як карэнную мінчанку не пакідае абыякавым тое, як абнавіўся пасля рэстаўрацыі Верхні горад, Вялікі тэатр оперы і балета, Купалаўскі тэатр. Захоўваецца стыль праспекта Незалежнасці - сталінскі ампір, які прываблівае турыстаў як унікальная культурная і гістарычная з'ява. Як бы звычайна гэта ні гучала, але сёння ў Мінску велізарная колькасць мясцін, дзе можна проста з задавальненнем правесці час: вулачкі з утульнымі рэстаранамі, пешаходная зона. Усё гэта таксама дух горада. Каб не бачыць, не заўважаць гэтага, трэба быць сляпым ці абыякавым", - лічыць субяседніца. Асаблівае стаўленне ў Беларусі - да захавання памяці аб Вялікай Айчыннай вайне. У кожным горадзе ёсць знакавыя месцы, дзякуючы якім бачны маштаб ваеннай трагедыі для беларусаў, адзначыла Кацярына Дулава. "Палітыка беларускай дзяржавы адметна вылучаецца на фоне таго, што сёння адбываецца ў некаторых еўрапейскіх краінах, дзе зносяць помнікі воінам-вызваліцелям", - сказала яна. Прафесар нагадала пра Усіхсвяцкі сабор, у крыпце якога сабрана зямля з месцаў баявой славы, а таксама з пахаванняў мірных жыхароў, якія сталі ахвярамі ваенных дзеянняў. У ліку ўнікальных помнікаў - мемарыяльны комплекс "Трасцянец", пабудаваны на месцы аднайменнага канцэнтрацыйнага лагера, што дзейнічаў у час Другой сусветнай вайны. Ён быў самым вялікім лагерам смерці на тэрыторыі Беларусі і былога СССР, у якім утрымліваліся грамадзяне з усіх рэспублік Саюза, а таксама з Аўстрыі, Германіі, Чэхаславакіі і Польшчы. Сёння мемарыяльны комплекс "Трасцянец" стаў месцам, куды прыязджаюць, каб пакланіцца памяці ахвяр вайны з розных краін Еўропы. Аўтар кампазіцыі "Брама памяці" скульптар Канстанцін Касцючэнка ўдастоены за яе стварэнне спецыяльнай прэміі Прэзідэнта дзеячам культуры і мастацтва. У свой час ён у ліку прадстаўнікоў таленавітай моладзі атрымліваў падтрымку спецфонду кіраўніка дзяржавы.-0- НАВIНЫ БЕЛАРУСI