Сістэмы аховы здароўя абласцей правялі падрыхтоўку да аказання меддапамогі пацыентам у перыяд другой хвалі каранавіруснай інфекцыі, паведамілі БЕЛТА ў прэс-службе Міністэрства аховы здароўя.
Ва ўсіх рэгіёнах арганізаваны дадатковыя пункты падачы кіслароду. Калі ў маі, напрыклад, у стацыянарах Магілёўскай вобласці іх было 1028, то цяпер 1551. Колькасць пунктаў падключэння кіслароду тут амаль у 2,5 раза вышэйшая за нарматыў.
На Магілёўшчыне створаны фонд, які ўключае больш за 400 апаратаў штучнай вентыляцыі лёгкіх і наркозна-дыхальных апаратаў. Усе яны ў рабочым стане. Закуплена 24 апараты ШВЛ. Камп'ютарную тамаграфію можна зрабіць у Магілёве, Бабруйску, Крычаве, Асіповічах, а лабараторна абследавацца метадам ПЦР - у Магілёўскім абласным цэнтры гігіены і эпідэміялогіі, Магілёўскай станцыі пералівання крыві, Магілёўскім скурвендыспансеры, Бабруйскім занальным цэнтры гігіены і эпідэміялогіі, Бабруйскім радзільным доме.
У стацыянарах Віцебскай вобласці для аказання кіслароднай падтрымкі ёсць 1790 кропак падключэння кіслароду. Дадаткова набыта 77 канцэнтратараў кіслароду, бескантактавыя тэрмометры, пульсаксіметры. На амбулаторным этапе для аказання дапамогі пацыентам з каранавіруснай інфекцыяй і кантактным асобам функцыянуюць 154 мабільныя медыцынскія брыгады. На базе Віцебскай гарадской бальніцы хуткай меддапамогі працуе цэнтр, які каардынуе накіраванне пацыентаў на шпіталізацыю ў залежнасці ад цяжару стану, патрэбнасці ў кіслароднай падтрымцы, аб'ёмах і інтэнсіўнасці лячэння.
Падрыхтоўка да другой хвалі COVID-19 у Брэсцкай і Гродзенскай абласцях ішла паралельна з лячэннем і прафілактыкай захворвання з вясенняга перыяду. На Брэстчыне функцыянуюць 1534 пункты падачы кіслароду, ёсць больш як 420 апаратаў штучнай вентыляцыі лёгкіх, у Гродзенскай - 1049 кропак і больш за 320 апаратаў ШВЛ. Усе апараты ў рабочым стане. Усяго ў бальніцах Брэсцкай вобласці больш за 13,4 тыс. ложкаў, Гродзенскай - больш за 8,9 тыс., частка з іх перапрафілявана для пацыентаў з COVID-19.
У Мінскай вобласці праводзіцца актыўная работа па мінімізацыі распаўсюджвання каранавіруснай інфекцыі. Для забеспячэння рэспіраторнай падтрымкі пацыентаў функцыянуе 2246 кропак падачы кіслароду. Створаны фонд, які ўключае 478 апаратаў штучнай вентыляцыі лёгкіх. Частка ложкавага фонду перапрафілявана для пацыентаў з інфекцыяй COVID-19.
План дадатковых мерапрыемстваў па папярэджанні распаўсюджвання інфекцыі распрацаваны ў Гомельскай вобласці. Тут функцыянуе 1715 кропак падачы кіслароду. Ёсць 483 апараты штучнай вентыляцыі лёгкіх. За перыяд летняй падрыхтоўкі да другой хвалі набыта 19 апаратаў ШВЛ, тры апараты для даследавання кіслотна-шчолачнага стану крыві з камплектамі рэагентаў і расходных матэрыялаў, 13 гемадынамічных манітораў.
У паліклініках і бальніцах Гомельшчыны створаны неабходны запас сродкаў аховы медперсаналу. Гэта больш за 2,4 млн аднаразовых масак, звыш 230 тыс. рэспіратараў, больш за 160 тыс. аднаразовых касцюмаў, звыш 8 тыс. шматразовых процічумных касцюмаў, больш як 1,6 млн медыцынскіх пальчатак, каля 30 тыс. ахоўных акуляраў, больш за 18,7 тыс. шчыткоў.
Ёсць запас лякарстваў процівіруснага, антыбактэрыяльнага і гарачкапаніжальнага дзеяння ў разліку на два месяцы. У аптэках усіх форм уласнасці і на складзе падтрымліваецца незніжальны запас масак, пальчатак і ахоўных касцюмаў, лякарстваў, антысептычных і дэзынфіцыруючых сродкаў для бесперабойнага забеспячэння насельніцтва. Праводзіцца пастаянны маніторынг аптэчнай сеткі па наяўнасці сродкаў аховы.
Існуючы ў абласцях ложкавы фонд цалкам задавальняе патрэбнасці насельніцтва ў стацыянарным лячэнні.-0-